ተጠባቂው የፋብሪጋስ ዝውውር ጥሩ ወይስ መጥፎ?

1)  ከአርሰናል ወደባርሳ የተጓዙ ሁሉም ማለት ይቻላል አልተሳካላቸውም:: ምናልባት ትዬሪ ኦንሪ ህልሙ የነበረውን የቻምፒየንስ ሊግ ዋንጫን ማሳካቱ ካልተጠቀሰ በስተቀር  ከአንድ ሲዝን ያለፈ አመርቂ ነገር አላሳየንም:: እርግጥ የእድሜና የ አሰላለፍ መወሳሰብ ጉዳዮች እንዳነበሩ አይታበልም:: የ ማርክ ኦቨርማርስ ኢማኑኤል ፐቲ እና አሌክሳንደር ህለብ ተሞክሮ ግን “ማሪኝ” አርሰናል አስብሏቸዋል::  ሶስቱም ተጭዋቾች  አርሰናልን መልቀቃቸው የስህተት ውሳኔ መሆኑ በግልጽ ተናግረውታል:: ፋብሪጋስስ ምን ይጠብቀው ይሆን?

2)  ከሁሉም አነጋጋሪው  የታክቲክና የቡድን ሽግሽጉ ምን ይመስላል የሚለው ይሆናል::

ፋብሪጋስ ተመራጩ ቦታው ላይ እማይጋፋው ባለችሎታ ተጭዋች አለ – ቻቢ!

አተገባበራቸው ይለያይ እንጂ ሁለቱም በባህሪያቸው የጨዋታን ትርታ መቆጣጠር ይወዳሉ:: ለአሁኑ ቻቢ የሚድፊልዱ ንጉስ ነው:: ፋብሪጋስም ለአርሰናል ዘንድሮን እንዳደረገው  ለፊት አጥቂው ቀረብ ብሎ ያማካይ አጥቂነትን ሚና ሊጫወት ይችላል:: ይህ ማለት ባላቂው ሲዝን አሰልጣኙ አብዝቶ የተጠቀመው የ 4-3-3 አሰላለፍ በወረቀት ላይ እንዳለ ይሆንና በተግባር ግን  ቡድኑ በአንድ አጥቂ እና በአንድ ያዥ አማካይ (holding midfielder) ብቻ ይጫወታል::  ኢንዬስታን ከግራ ሜሲ ከቀኝ ክንፍ   የፊት ጫፉ ላይ ደግሞ ዳቪድ ቪያ ወይንም ዝላታን ኢብራሂሞቪች ሆነው ባለሶስትዮሹን የጥቃት መስመር ይሞሉታል::  እነ ፔድሮ, ኦንሪ እና ቦያን ኪርኪችም ለቦታቸው የዋዛ ተፎካካሪ አይሆኑም:: (ይህ ከላይ የተዘረዘረው  የ 4-3-3  ፎርሜሽንን ተግባራዊ ያደርጋሉ በሚለው ታሳቢነት ነው::)

ኢንዬስታ ምናልባት ከቻቢ ጎን  ቦታውን አስከብሮ ፋብሪጋስ ወደ ግራ እንዲያዘነብል ሊገፋ ይችላል::

አሰልጣኝ ጋርዲዮላ እስካሁን በአመርቂ ሁኔታ የሰራለትን ታክቲክ አፍርሶ አዲስ ነገር ለመሞከር ምን ያህል እንደሚደፍር ለመገመት ያስቸግራል:: ከሞከረስ ‘ይሳካለታል ወይ’? ብሎም መጠየቅ ተገቢ ነው:: ፋብሪጋስም ሊፈጠር በሚችለው የለውጥ ሽግሽግ ሰለባ ላይሆን ምንም ማረጋገጫ የለም::

3) ከ 16 አመት ታዳጊነት አንስቶ እስከቡድን አምበልነት የበቃበትን ቡድን ትቶ መሄድ ለፋብሪጋስ ቀላል አይሆንም:: በሰባራ እግሩ ፍጹም ቅጣት ምት እስከመምታት ያደረሰው የአርሰናል ፍቅር እንደዋዛ አይወጣለትም:: አርሰናል ቤት እንደማንም አይደለም:: ልዩ የቤተሰብ ቡድን ነው:: ተጭዋቾች አሰልጣኝ ቬንገርን በልዩ ፍቅር ነው የሚወዱት:: የሰውየው ውለታን አውርተውት አይጠግቡም:: የሰር አሌክስ ፈርግሰን ፍቅር ከአስፈላጊ ቁንጥጫ ጋ ሲሆን የቬንገር ደግሞ እንደሚሳሳ አባት ከእንክብካቤ ጋር ነው:: ይሄ ሁሉ ስፔን ምድር ላይ አይኖርም::

4) እንግሊዛውያን ደጋፊዎች ከሚታወቁባቸው በርካታ ባህርያቶች መካከል አንዱ ታማኝ ፍቅራቸው ነው:: ቆይታው አጭር ይሁን ረጅም አንድ ተጨዋች ልባቸው ከገባ ለዘላለም ይዘክሩታል::  ብራዚላዊውን ጁኒንዮ በሚድልስብሮ ሪቨርሳይድ ስቴድየም  “አምላክ” እያሉ አሁንም ያሞካሹታል:: ካንቶናንም መጥቀስ ይቻላል:: ፋብሪጋስ በስካሁኑ የሰሜን ለንደን ቆይታው ለቡድኑ የከፈለው መስዋእትነት የደጋፊውን ፍቅር መግዛት ችሏል::

የስፔን ፉትቦል ባህል ግን እጅጉን ይለያል :: ሊያደንቁም ሊያንቋሽሹም ችኩል ናቸው:: ወቅታዊ እንቅስቃሴና ውጤት ከምንም በላይ ትኩረት ይሰጣቸዋል:: እንደዚያ ያስፈነደቃቸው ተአምረኛውን ሮናልዲኞ ፊታቸው ሊያዞሩበት ጥቂት ወራቶች ብቻ በቂ ነበሩ:: ( እርግጥ ሮናልዲኞ ከሜዳ ውጭ የሚያረጋቸው ነገሮች ትክክል አልነበሩም)::

ስለዚህ ፋብሪጋስ ኤምሬትስ ስታድየምን ለቆ ሲሄድ  ጥሎ የሚሄደው ይህ ከደጋፊው አለገደብ የሚለገሰው ” unconditional love”ን ጭምር ነው::

በኑ ካምፕ የሚጠብቀውን ማንም አያውቅም::

ለአርሰናል ጥቅምና ጉዳቱ : 

ጉልህ ጥቅሙ ያው ዳጎስ ያለ ገንዘብ ያገኙበታል:: ከፈለጉ ክለቡ ያለበትን እዳ ለመክፈያ ያውሉታል:: ካሻቸው ደግሞ  በከፊሉ የፋብሪጋስን ተተኪ  የማስፈረም እድልን ይፈጥርላቸዋል (የፈረንሳዩ ጨዋታ አቀጣጣይ ዮሀን ጉርኩፍን በጎን እያነጋገሩ እንደሆነ እየተሰማ ነው):: ጉዳቱን ያየን እንደሆነ አርሰናል የሚያጣው  አውራ ተጭዋቹን ነው:: ይህ በራሱ ቡድኑን 2 እርምጃ የሗሊዮሽ  የመጎተት ሀይል አለው:: የራቃቸውን ድል ባጭር ግዜ ውስጥ ማስመዝገብ ከፈለጉ  ፋብሪጋስና ቫንፐርሲ የግድ የዚህ ቡድን አካል መሆን አለባቸው:: አለበለዝያ እንደገና ግንባታ ሌላ ረጅም ዋንጫ አልባ ጉዞ!

ዝውውሩ ከተሳካ አርሰናልን ለድል ከሚፋለም ቡድንነቱ ይልቅ ለሌሎች መጋቢ ቡድን አድርጎ የመመልከት አዝማምያው ሊያይል ይችላል:: ይህ ደሞ በቀሩት ተጭዋቾች ዘንድ ያልተፈለገ ስነልቦናዊ ጫናን ያሳድራል::

ለባርሳ ጥቅምና ጉዳቱ : 

በችሎታ የተትረፈረፉት ባርሳዎች ባላቸው ስብስብ ላይ ፋብሪጋስን ካከሉበት ምን አይነት ቡድን ሊፈጠር እንደሚችል ማሰቡ ራሱ ይከብዳል:: ማንስ ያቆማቸዋል? ሜሲ በአንድ ወቅት ” ይህን የባርሳ ቡድን  ካለበት ሊያሻሽሉት ከሚችሉ ጥቂት ተጭዋቾች መካከል አንዱ ፋብሪጋስ ነው” ብሎ የልጁን መቀላቀል በጉጉት እንደሚጠብቀው ተናግሯል:: በተጨማሪም  አመራሮቹ ሁሌ ለሚተጉለት የካታሉኛ ግዛት መመክያ ምልክትነት የፋብሪጋስ ወደ አሳዳጊው ክለብ መመለስ አላማቸውን ያጠናክረዋል::

ጉዳቱ ተብሎ የሚሰጋው የባርሴሎና ጋላክቲኮ አዝማምያ ነው:: ከዋክብትን የማሰባሰብ ሱስ  በስተመጨረሻ ሪያል ማድሪድን ለውድቀት እንዳበቃው ማንም ያስታውሳል:: ባላቸው ከበቂ በላይ ግሩም ስብስብ ላይ የነፋብሪጋስ መታከል ለአያያዝ አስቸግሮ እንደ ተቀናቃናቸው ሁሉ ፍርክስክሱ እንዳይወጣ  የደጋፊው ድጋፍ ብቻ ሳይሆን ጸሎትም ያሻል::